Дело 15. 1555.07.05 / 1555.07.08
Сознане Михайла Мокаровича листу, запису его, п(а)ну Остафъю Воловичу даного, на сто коп грошей его м(и)л(ости) винных, и позволене за неуищенем на рок увезатсе у имене его Понерлицу.
Лето Бож(его) нарож(енья) 1555, м(е)с(я)ца июля 8 дня, у понедялокъ.
Пришедши до книгъ г(о)с(по)д(а)ръских дворанинъ его кролевъское м(и)л(о)сти Михайло Макаровичъ, оповедалъ и доброволне то созналъ, ижъ
// [лист 16]
што который сынъ его Иванъ, держачи урадъ отъ пана Остафъя Воловина, маршалъка и писара г(о)с(по)д(а)ръского, старосты медницкого и могилевского, осталъ виненъ его м(и)л(о)сти на личбе до скарбу его кролевской м(и)л(о)сти пенезей г(о)с(по)д(а)ръских полътораста копъ грошей. Где жъ дей панъ Остафей за прозбою его пятдесят копъ грошей с тых пенезеи выпустить рачилъ и самъ ся перенялъ до скарбу его кролевской м(и)л(о)сти платити. А сто копъ грошей маеть панъ Михаиле Мокаровичъ пану Остафъю заплатит на часъ и рокъ певный, на Всих Светых, свято пришълое будучое, в року теперешнемъ пятьдесять пятомъ. А естли бы на тоть рокъ оных пенезей ста копъ грошей его м(и)л(о)сти пану Остафью не заплатилъ, тогды маеть в той суме пенезеи панъ Остафей увезатися в ыменье его Понерлицу: въ дворъ и въ гумно, и всю маетность. А ижъ тежъ тое именье Понерлица тое сумы пенезеи ста копъ грошей не стоить, тогды тежъ маеть панъ Остафей на именья его, которие есть от него въ заставе, Рогожница Великая у пана Богдана Брезоеского, а другое у пани Ивановое Воловичовое, конюшиное троцкое, пани Филей Павъловны Рогожница Малая, зо всимъ на все, яко они отъ него в себе мають выкупите, и тые вси именья на себе деръжати до того часу, поки тые пенези: яко сто копъ грошей, такъ тежъ и тые, которие его м(и)л(о)сть дасть выкупуючи, тые именья отъ пана Богдана Брожовского и пани Ивановое Воловича отъдасть. На што и листь свой записный панъ Михайло Мокаровичъ пану Осътафъю далъ, который, объявивши, просилъ, абы до книгъ г(о)с(по)д(а)рских записано было. И такъ ся в собе оный листь маеть:
"Я, Михайло
// [лист 16 оборот]
Мокарович, сознавамъ тымъ моимъ листомъ, што жъ который сынъ мой Иванъ, держачи урадъ отъ его м(и)л(о)сти пана Остафъя Богдановича Воловича, маръшалка и писара г(о)с(по)д(а)ръского, старосты могилевского, в Медниках, осталъ его м(и)л(о)сти виненъ на личбе пенезей г(о)с(по)д(а)рских полътораста копъ грошей. Яко жъ есми и первей того далъ былъ его м(и)л(о)сти записъ на тую полътораста копъ грошей и мелъ его м(и)л(о)сти тую полтораста копъ грошей отъдати на рокъ певный, то есть о Велицедни, свята прошлого, которое свято было в року пятьдесять пятомъ. И кгды рокъ той суме пенезеи водле запису моего припалъ, то есть на Великденъ, тогдымъ я его м(и)л(о)сти билъ чоломъ, абы его м(и)л(о)сть рачилъ ласку свою вчинить и тое сумы пенезеи на иншии роки подождать. И его м(и)л(о)ст рачилъ на мое чоломъбитье то вчинить и мне с тых пенезей пятьдесять копъ грошей выпустить, бачечи мое вбозъство и недостатокъ, и перенялъся самъ до скарбу г(о)с(по)д(а)ръского то заплатити. А сто коп грошей маю его м(и)л(о)сти отъдати и заплатити на рокъ певъный, то есть Вси Светые, свято прийдучого, которое свято будеть в нинешнемъ року пятьдесять пятомъ. Естли жъ бы я, Михайло, его м(и)л(о)сти тое сумы пенезеи, то есть ста копъ грошей на тоть рокъ вышейописаный не отьдалъ, тогды его листь маеть водъле первшого и сего запису моего, кромъ жадного права в той суме пенезеи, то есть у сту копах грошей, увезатися в ыменье мое Понерълицу: въ дворъ, и въ гумно, и всю маетность. А ижъ тая Понерлица того не стоить, ино што которие именья Рогожница Великая, то есть в заставе в пана Богдана Брожовского, и другое в па
// [лист 17]
ни Богдановое Воловича, конюшиное троцкое, у пани Филеи Павловны есть Рогожница Малая, з людми, с пашнями дверными тых именей Рогожинъ въ трехсоть копах, а Рогожинец - в шестидесять и шести копах грошей. Яко жъ рокъ тымъ именьямъ припадаеть окупити на Великденъ, свята пришлого, которое свято маеть быть в року пятьдесять шостомъ, то есть Рогожину, што у Ражовского, зятя моего, а Рогожницы Малой, которое в заставе у пани Конюшиное, пани Ивановое в шестидесять и въ шести копах грошей, то есть по Велицедни того жъ року, м(е)с(я)ца мая первого дня.
Ино вжо болшое сумы на тые именья брати и зоставою, и продажею и никоторими иными обычайми заводити тых именей и земли, и людей отъ них не маю и не буду мети моцы, покул в тых пенезех яко в речи скарбной г(о)с(по)д(а)ръской пану Остафъю справлюся и сто копъ всю сполна заплачу на рокъ помененый. Естли жъ бых я, Михайло верхуписаный, тое сумы п(е)незей, то есть ста копъ грошей на тотъ рокъ вышейописаный его м(и)л(о)сти не отъдалъ, тогды его м(и)л(о)сть яко водлугъ первшого запису, такъ и теперешнег[о] маеть тое именье Понерлицу в моцы своей держати. И тые именья, которые суть в заставе у пана Бражовъского и в пани конюшиное, маеть его м(и)л(о)сть выкупить и въ своей моцы держати и въживати потулъ, покул его м(и)л(о)сти тую суму пенезей, у чомъ его м(и)л(о)сти будеть, зуполна отъдамъ.
Яко жъ я, Михайло верхуписаный, тотъ мой запис объявилъ есми и до книгь г(о)с(по)д(а)ръских записати далъ.
На што даю пану Остафъю сесь мой листъ подъ моею печатью и подъ печатьми людей добрих их м(и)л(о)сти панов: пана Остафъя Халецкого,
// [лист 16 оборот]
а пана Михаила Гринъкевича Воловича, а князя Михаила Богушевича Масалского.
П[и]сан на Боли, лета Божего нароженья тисяча пятьсотъ пя/ядесятъ пятого, м(е)с(я)ца июля пятого дня".
На што жъ панъ Остафей взялъ выписъ с книгь г(о)с(по)д(а)ръских.